ଖଇରା,(ନାଗରାଜ ନ୍ୟୁଜ): ଖଇରା-ବାଲେଶ୍ଵର ସହରରେ ଥିବା ଶ୍ରୀଜଗନ୍ନାଥ ଗ୍ରୁପ ଅଫ ଇନଷ୍ଟିଚ୍ୟୁସନର ସ୍ଵାଗତ ସମ୍ବର୍ଦ୍ଧନା ଦିବସ ପାଳିତ ହୋଇଯାଇଛି। ଶ୍ରୀଜଗନ୍ନାଥ ଗ୍ରୁପ ଅଫ ଇନଷ୍ଟିଚ୍ୟୁସନ ହେଉଛି ଏକ ଆବାସିକ ବିଦ୍ୟାଳୟ, ଯେଉଁଥିରେ ୬ଷ୍ଠ ଶ୍ରେଣୀ ଠାରୁ ଆରମ୍ଭ କରି ଯୁକ୍ତ ୨ ବିଜ୍ଞାନ ଶ୍ରେଣୀ ପର୍ଯ୍ୟନ୍ତ ପାଠ ପଢିବା ପାଇଁ ବ୍ୟବସ୍ଥା ରହିଅଛି। ଏହି ଶିକ୍ଷାନୁଷ୍ଠାନରେ ଦୈନିକ ବ୍ୟାୟାମ ସହିତ ଗୀତା ପାଠ କରାଯାଇଥାଏ ଏବଂ ଏହା ସହିତ ଏକ ସୁନ୍ଦର ଶୈକ୍ଷିକ ପରିବେଶ ମଧ୍ୟ ରହିଛି। ଏହି ସ୍ୱାଗତ ସମ୍ବର୍ଦ୍ଧନା ଉତ୍ସବରେ ବାଲେଶ୍ଵର ଡିଇଓ ବିଷ୍ଣୁ ଚରଣ ସୁତାର ମୁଖ୍ୟ ଅତିଥି ଭାବେ ଯୋଗଦେଇ ଥିବାବେଳେ ଦୈନିକ ସମାଜ ବାଲେଶ୍ଵର ସଂସ୍କରଣ ଜେନେରାଲ ମ୍ୟାନେଜର କୁଳମଣି ବାରିକ ମୁଖ୍ୟବକ୍ତା ଭାବେ ଯୋଗଦେଇ ନିଜର ବକ୍ତବ୍ୟ ରଖିଥିଲେ। ଅନ୍ୟ ଅତିଥି ମାନଙ୍କ ମଧ୍ୟରେ ଶ୍ରୀଜଗନ୍ନାଥ ଗ୍ରୁପ ଅଫ ଇନଷ୍ଟିଚ୍ୟୁସନର ଚେୟାରମ୍ୟାନ ଗଙ୍ଗାଧର ଜେନା,ସଦର ବ୍ଲକ ବିଇଓ ମିହିର କୁମାର ପ୍ରଧାନ, ଶ୍ରୀଜଗନ୍ନାଥ ଯୁକ୍ତ ୨ ବିଜ୍ଞାନ କଲେଜର ଅଧ୍ୟକ୍ଷ ଗଣେଶ କୁମାର ଜେନା, ଶ୍ରୀଜଗନ୍ନାଥ ଆବାସିକ ବିଦ୍ୟାଳୟର ପ୍ରଧାନ ଶିକ୍ଷକ ଶେଖ ମୁସ୍ତାକ ଅଲ୍ଲୀ, ବରିଷ୍ଠ ଶିକ୍ଷକ ନିତ୍ୟାନନ୍ଦ ପାତ୍ର ପ୍ରମୁଖ ଯୋଗଦେଇ ଅନୁଷ୍ଠାନର ଉତ୍ତରୋତ୍ତର କାମନା କରିବା ସହିତ ନିଜ ନିଜର ବକ୍ତବ୍ୟ ରଖିଥିଲେ। ଏହି ସ୍ୱାଗତ ସମ୍ବର୍ଦ୍ଧନା ଉତ୍ସବରେ ପ୍ରଥମେ ଶ୍ରୀଜଗନ୍ନାଥଙ୍କ ଫଟୋ ଚିତ୍ରରେ ପ୍ରଦୀପ ଏବଂ ପୁଷ୍ପ ପ୍ରଦାନ କରିବା ପରେ ଛାତ୍ରୀମାନଙ୍କ ଦ୍ୱାରା ସ୍ୱାଗତ ସଙ୍ଗୀତ ଗାନ କରାଯାଇଥିଲା। ଏହି କାର୍ଯ୍ୟକ୍ରମରେ ବିଦ୍ୟାଳୟର ସମସ୍ତ ଛାତ୍ରଛାତ୍ରୀ ଭାଗ ନେଇଥିଲା ବେଳେ ବିଦ୍ୟାଳୟର କର୍ମଚାରୀ ମାନେ କାର୍ଯ୍ୟକ୍ରମକୁ ସହଯୋଗ କରିଥିଲେ।
ବାଲେଶ୍ବର ଜିଲ୍ଲା ଖଇରାରୁ ଲୋଚନ ରାଉତଙ୍କ ରିପୋର୍ଟ