ସୁନ୍ଦରଗଡ଼/ରାଜଗାଙ୍ଗପୁର, (ନାଗରାଜ ନ୍ୟୁଜ): ସୁନ୍ଦରଗଡ଼ ଜିଲ୍ଲାର ରାଜଗାଙ୍ଗପୁର ପୋଲିସ ଡାଳେ ଡାଳେ ଗଲେ ଚୋରମାନେ ପତ୍ରେ ପତ୍ରେ ଯାଉଛନ୍ତି । ଏଠାରେ ପୋଲିସର ପହ୍ଲା କେତେବେଳେ ଭାରିପଡୁଛିତ ଆଉ କେତେବେଳେ ଅପରାଧୀ ମାନେ ଆଗରେ ରହୁଛନ୍ତି । ଗତ ଦୁଇ ମାସ ମଧ୍ୟରେ ପୋଲିସ ଅପରାଧୀ ମଧ୍ୟରେ ବେଶ ଛକାପଞ୍ଝା ଦେଖିବାକୁ ମିଳୁଛି ।
ପୋଲିସ କେତେବେଳେ ଡ୍ରଗ୍ସ ଅପରାଧୀକୁ କାବୁ କରି ଜେଲ୍ ପଠାଉଥିବା ବେଳେ ସହରକୁ ଅପରାଧ ମୁକ୍ତ ଏବଂ ନିଶା ମୁକ୍ତ କରିବା ପାଇଁ ଦିନରାତି ଏକ କରୁଛନ୍ତି, ହେଲେ ଆଜି ପୁଣି ପୋଲିସକୁ ଖୋଲା ଚ୍ୟାଲେଞ୍ଜ କରି ଥାନା ଠାରୁ ମାତ୍ର ଦୁଇ ଶହ ମିଟର ଦୂରରେ ଥିବା ସହରର ଜଣାଶୁଣା ଶ୍ରୀବସ୍ତ୍ର କପଡ଼ା ଦୋକାନ ମାଲିକଙ୍କ ଘରେ ସଶସ୍ତ୍ର ଡକାୟତି ହୋଇଛି । ରାତି ୨ଟାରୁ ୩ଟା ମଧ୍ୟ ରେ ୬/୭ଜଣ ଦୃର୍ବୁତ କାନ୍ଥ ଡେଇଁ କପଡ଼ା ଦୋକାନୀ କମଲ ଅଗ୍ରୱାଲଙ୍କ ଘରଭିତରକୁ ପଶି ସ୍ୱାମୀ ସ୍ତ୍ରୀଙ୍କୁ ବାନ୍ଧି ଛୁରୀ, ଭୁଜାଲି ଏବଂ ଆଇରନ ରଡ଼ ଦେଖାଇ ଭୟଭୀତ କରି ଆଲମିରାରେ ଥିବା ନଗଦପାଞ୍ଚଲକ୍ଷ ଓ ପନ୍ଦର ଲକ୍ଷ ଟଙ୍କାର ସୁନାଗହଣା ଲୁଟି ନେଇଯାଇଥିଲେ । ପରେ ଅଗ୍ରୱାଲ ରାଜଗାଙ୍ଗପୁର ଥାନାରେ ଲିଖିତ ଅଭିଯୋଗ କରିବାରୁ ଏସଡିପିଓ ଶଶାଙ୍କ ଶେଖର ବେଉରା ଏବଂ ଥାନା ଅଧିକାରୀ ଶ୍ରୀବତ୍ସ ପ୍ରଧାନ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।