କଟକ, (ନାଗରାଜ ନ୍ୟୁଜ): ଦୈତ ନଗରୀର ଏକ ବଡ଼ ଲୁଟେରା ଗ୍ୟାଙ୍ଗକୁ ଗିରଫ କରିଛି ଚୌଦ୍ୱାର ଥାନା ପୋଲିସ । କଟକ ଓ ଭୁବନେଶ୍ୱର ସହ ଆଖପାଖ ଅଞ୍ଚଳରେ ଏମାନେ କରୁଥିଲେ ଲୁଟ୍ ପାଟ୍ । ଲୁଟ୍ ଗ୍ୟାଙ୍ଗର ମୁଖ୍ୟ ଲୁଟେରା ସୁବ୍ରତ ଭଟ୍ଟ ସହ ତାର ଦୁଇ ଜଣ ସହଯୋଗୀ ଦେବାଶିଷ ସ୍ଵାଇଁ ଓ ଶୁଭମ କୋକାଟେ ଗିରଫ ହୋଇଛନ୍ତି। ଏମାନଙ୍କ ନିକଟରୁ ଜବତ କରାଯାଇଛି ୨୨ ଟି ସୁନା ଚେନ୍ ଯାହାର ଓଜନ ୨୯୫ ଗ୍ରାମ । ଏହା ସହ ଦୁଇଟି ପଲସର୍ ବାଇକ ମଧ୍ୟ ଜବତ କରାଯାଇଛି । ସୁବ୍ରତ ଓ ତା ଗ୍ୟାଙ୍ଗ ସୁନା ଅଳଙ୍କାର ଲୁଟ କରି ଦେବାଶିଷ ଓ ଶୁଭମ ପାଖେ ଦେଇଥିଲେ । ଏମାନେ ଦୁଇ ଜଣ ଲୁଟ ଅଳଙ୍କାରକୁ ତରଳେଇ ମାର୍କେଟରେ ବିକ୍ରୀ କରୁଥିଲେ । ଏମାନଙ୍କ ଯୋଗାଯୋଗରେ ମଧ୍ୟ କିଛି ସୁନା ଦୋକାନୀ ଅଛନ୍ତି । ଯାହାଙ୍କୁ ଆଗାମୀ ସମୟରେ ମଧ୍ୟ ଗିରଫ କରାଯିବ । ଏହି ଗ୍ୟାଙ୍ଗର ମୁଖ୍ୟ ଲୁଟେରା ସୁବ୍ରତ ଭଟ୍ଟ ନାଁରେ ୨୦୦୮ ରୁ କମିଶନରେଟ ପୋଲିସର ବିଭିନ୍ନ ଥାନାରେ ୩୩ ଟି ମାମଲା ରହିଥିବା ବେଳେ ସହଯୋଗୀ ଶୁଭମ କୋକାଟେ ନାଁରେ ରହିଛି ୨୧ ଟି ମାମଲା । ସୂଚନା ଦେଲେ କଟକ ଡିସିପି ପ୍ରତୀକ ସିଂ ।