ବାଙ୍କୀ, (ନାଗରାଜ ନ୍ୟୁଜ): ବାଙ୍କୀ ସ୍ୱୟଂ ଶାସିତ ମହାବିଦ୍ୟାଳୟରୁ ଅନିର୍ଦ୍ଧିଷ୍ଟ କାଳ ପାଇଁ ବିଦ୍ୟୁତ ସଂଯୋଗ କାଟି ଦିଆଯାଇଛି । ଚିନ୍ତାରେ ଛାତ୍ରଛାତ୍ରୀ । ୯ ଲକ୍ଷ ଟଙ୍କା ବିଦ୍ୟୁତ ବିଲ ବକେୟା ରହିଥିବା ଯୋଗୁ ଏଭଳି ସମସ୍ୟା ଦେଖାଦେଇଛି । ତେବେ ଶ୍ରେଣୀ ଗୃହ ଅନ୍ଧାର ଥିବାରୁ ଅଧ୍ୟୟନ ରତ ଛାତ୍ରଛାତ୍ରୀଙ୍କ ପାଠ ପଢାରେ ବାଧା ଉପୁଜିଛି । ବାଧ୍ୟ ହୋଇ ପାଠ ନପଢି ବାହାରେ ବୁଲୁଛନ୍ତି ଛାତ୍ରଛାତ୍ରୀ ।
ଅନ୍ୟପକ୍ଷେ କଲେଜ କର୍ତ୍ତୃପକ୍ଷ କହିଛନ୍ତିଯେ, ବକେୟା ବିଦ୍ୟୁତ ବିଲ ପୈଠ କରିବା ପାଇଁ କିଛି ଦିନର ମହଲତ ମାଗିଥିଲୁ । ହେଲେ ବିଦ୍ୟୁତ ବିଭାଗ ଶୁଣିଲାନି । ବିଦ୍ୟୁତ ବିଲ କିଭଳି ପୈଠ କରାଯିବ ସେନେଇ କର୍ତ୍ତୃପକ୍ଷ ଚିନ୍ତାରେ ରହିଥିବା ବେଳେ କଲେଜର ପୁରାତନ ଛାତ୍ରଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି । ସେମାନଙ୍କ କହିବା କଥା ଅନୁସାରେ ଛାତ୍ରଛାତ୍ରୀଙ୍କ ନିକଟରୁ ବିଦ୍ୟୁତ ପୈଠ ବାବଦକୁ ଆସୁଥିବା ଅର୍ଥରାଶିକୁ ସଠିକ ସମୟରେ କଲେଜ କର୍ତ୍ତୃପକ୍ଷ ପୈଠ ନ କରିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି । ଯଥାଶୀଘ୍ର ବିଦ୍ୟୁତ ସଂଯୋଗ କରିବା ପାଇଁ ଛାତ୍ର ଛାତ୍ରୀଙ୍କ ଦାବି କରିଛନ୍ତି ।