କଟକ, (ନାଗରାଜ ନ୍ୟୁଜ): କଟକ ବାଲିଯାତ୍ରା ପଡିଆରେ ଉଦଘାଟିତ ହୋଇଛି ମହାନଦୀ ମହୋତ୍ସବ । ପାଞ୍ଚଦିନ ଧରି ଚାଲିବାକୁ ଥିବା ଏହି ମହୋତ୍ସବରେ ପ୍ରତ୍ୟେକ ଦିନ ସଂସ୍କୃତିକ କାର୍ଯ୍ୟକ୍ରମ ଠାରୁ ଆରମ୍ଭ କରି ସ୍କୁଲ ପିଲାମାନଙ୍କୁ ନେଇ ପ୍ରତିଯୋଗିତା ମାନ କରାଯିବ । ପଞ୍ଚାୟତିରାଜ, ପାନୀୟ ଜଳ ଓ ଆଇନ ମନ୍ତ୍ରୀ ପ୍ରତାପ ଜେନା ଏହି ଉତ୍ସବ କୁ ଉଦଘାଟନ କରିଛନ୍ତି ।ମହାନଦୀ ଆମର ଗର୍ବ ଓ ଏହାର ସୁରକ୍ଷା ଆମ ସମସ୍ତଙ୍କ ଦାୟିତ୍ୱ ହୋଇଥିବାରୁ ଏହି ଉତ୍ସବ ମାଧ୍ୟମରେ ନଦୀର ସୁରକ୍ଷା ନେଇ ପ୍ରଚାର ପ୍ରସାର କରାଯିବ। ତେବେ ମହାନଦୀ କୂଳରେ ପୂଜାର୍ଚ୍ଚନା କରାଯିବା ସହ ମହାନଦୀ ବନ୍ଧାଣ ଉତ୍ସବ ମଧ୍ୟ ପାଳନ କରାଯାଇଥିଲା । ବହୁ ସଂଖ୍ୟାରେ ସାଧୁସନ୍ଥ, ସଂକୀର୍ତ୍ତନ ମଣ୍ଡଳୀ ଏବଂ ବିଶିଷ୍ଟ ଅତିଥି ମାନେ ଉପସ୍ଥିତ ଥିଲେ । ଏହି ଉତ୍ସବରେ ବାରବାଟୀ କଟକ ବିଧାୟକ ମହମ୍ମଦ ମୋକାମ୍, ପୂର୍ବତନ ବିଧାୟକ ଦେବାଶିଷ ସାମନ୍ତରାୟ, ଜିଲ୍ଲାପାଳ ଭବାନୀଶଙ୍କର ଚୟନୀ, ସିଏମସି କମିସନର ଅନନ୍ୟା ଦାସ ଏଥିରେ ଅତିଥି ଭାବେ ଯୋଗ ଦେଇଥିଲେ । ଆସନ୍ତା ୨୦ ତାରିଖ ପର୍ଯ୍ୟନ୍ତ ପ୍ରତି ସଂଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ ।